Napadayawan kas Most Outstanding Librarian ita a tawen ni Ms. Easter Wahayna-Pablo, head librarian ti Baguio City Public Library.
Daytoy ket impaay ti Association of Librarians in Public Sector Inc. nu sadino, ni Pablo ti nagdominar kadagiti daduma pay a librarians a napadayawan pakairamanan dagiti manipod Laguna, ken Quezon City.
Bigbigbigen ti nasao a pammadayaw ti nasayaat ken organisado a panangidaulo ni Pablo iti nasao a library iti siudad ti Baguio.
Gapu iti dayta, impeksa ni Pablo ti panagyamanna kadagiti kakaduana iti library a sigun kenkuana ket karaman metlaeng iti nasao a pammadayaw.
Kagiddan dayta, impanamnama ti opisyal ti ad-adda pay a panangpasayaatda iti panangipaayda ti serbisyo kadagiti umili iti Baguio City.
Innayonna a saan latta a maud-udi iti panagipaay ti dekalidad a serbisyo ti Baguio City Public Library nu idilig kadagiti daduma pay nga agkakadakkel a library iti pagilian iti baet a medyo bassit ken daanen daytoy.
Kabayatanna, al-allukuyenna dagiti estudyante, wenno dagiti interesado a boluntrayo a mangisuro kadagiti ubbing iti nagduduma nga asignatura a mabalin dagitoy ti agturong iti nasao library para iti panagpaiskedyulda.//Bombo Jerwin Aquino
