LA TRINIDAD, BENGUET – Nakasagana ti Municipal Disaster Risk Reduction and Management Council ti La Trinidad, Benguet para iti panagtutudo ken posible a napigsa a bagyo.
Iti pannakiuman ti Bombo Radyo kenni Yushi Labi, mangidadaulo iti Municipal Disaster Risk Reduction and Management Council ti La Trinidad, kinunana a nangisayangkat dagitoy iti pre-disaster risks assesment meeting.
Iti nasao nga aktibidad, sinukimatda dagiti landslide ken flashfloods equipment dagitoy.
Malaksid iti dayta, naorganisa metlaeng dagiti response cluster ken maisagsagana dagiti non-food ken food packs.
Sigun kenni Labi, nakasagana metlaeng dagiti tallo nga evacuation center; maysa idiay Barangay Alapang a pagbakwitan dagiti residente iti Barangay Bahong, Alno ken Shilan; maikadua idiay Barangay Tawang a pagbakwitan met dagiti residente idiay Barangay Ambiong ken Beckel; bayat a ti evacuation center iti Munisiyo ket pagbakwitan dagiti residente idiay Barangay Puguis, Pico, Balili ken dadduma pay.
Mabalin metlaeng a maaramat dagiti pagadalan kas evacuation center.
Mainaig iti dayta, naimuntar dagiti CCTV ken water level monitoring kadagiti lugar a kadawyan a makapaspasar iti panaglayus sadiay La Trinidad tapno dagus a masukimat dagiti pag-ayusan ti danum.
Paset daytoy ti panagsagana ti nasao a Munisipyo iti posible a sumangbay a bagyo.
Sigun kenni Labi, 50% agingga 75% ti panagsagana nga ar-aramidenda a pakairamanan ti panagsanay kadagiti kameng ti ahensia dagitoy.
Mangipapaayda metlaeng iti information dissemination kadagiti pagadalan ken dagiti barangay ti La Trinidad.
Nabilin metlaeng dagiti residente a dagus nga agbakwit iti kanito a mapasaran ti napigsa a bagyo ken panagtutudo.
Iti kanito nga adda dagiti agkedked nga agbawit, kasapulan a pilitenda babaen iti tulong dagiti kameng ti Pulisya.
Nabilin metlaeng dagiti residente nga isaganada dagiti “Go Bags” dagitoy tapno nakasagana iti kanito a mapasaran dagiti emerhensia.
Kabayatanna, naiwaras kadagiti residente dagiti stickers a pakakitaan iti hotline dagiti nagduduma nga ahensia a mabalin a pagkamangan.
Pakairamanan ti Philippine National Police, Bureau of Fire Protection, Municipal Disaster Risk Reduction and Management Council, Red cross ken dadduma pay. //mp4
