BAGUIO CITY – Nanayunan pay dagiti isolated a babbarangay iti probinsia ti Abra gapu iti agtultuloy a mapasparanda sadiay a panagtutudo gapu iti nepnep wenno habagat.
Iti interview ti Bombo Radyo Baguio ken ni Abra Provincial Disaster Risk Reduction Management (PDRRMO) Officer Arnel Valdez, inaklonnna dagitoy dagiti babbarangay wenno lugar a kadawyan nga makapaspasar iti panaglayos ken panagreggaay.
Pakairaman ditoy dagiti sumagmamano a babbarangay iti munisipyo ti Malibcong, Tubo, Manabo, Lacob, Sallapadan, Licuan-Baay Langiden, San Quintin, Tineg, Lagayan ken Pilar bayat nga manarimaan pay ti beripikasion ken panagwanawanda kadagiti dadduma pay a barangay.
Sigun kenkuana, kangrunaan a rason ti pannaka-isolate dagitoy ti mapaspasaranda a nangato a lebel ti danom kadagitoy nga lugar.
Malaksid iti dayta, naipasidong metten ti Munisipyo ti Licuan-Baay iti State of Calamity ita nga aldaw gapu paylaeng iti mapasparanda nga panagreggaay, pannakadadael dagiti imprastruktura ken agrikultura nga intunda ti habagat.
Kabayatana, dumanon itan iti nasurok P88.4-M ti pakabuklan nga gatad ti danyos iti sektor ti agrikultura ken imprastruktura sadiay gapu iti Habagat.
Buklen daytoy ti nasurok P40.4-M a danyos iti mula kas iti pagay ken mais; nasurok P569,000 iti pangngalap; P499-K iti livestocks; nasurok P633-K a talon; P450-K met iti irigasyon; nasurok met iti P6.3-M ti dadael kadagiti farm-to market road; P3-M iti provincial roads ken P331-K a gatad dagiti dadduma pay a nadadael sadiay.
Naipatulod metten kadagiti pampamilya nga apektado ti habagat ti food packs a nagtaud iti gobierno bayat nga saanda pay naipaayan iti tulong dagiti apektado iti Munisipyo ti Pilar ken Villaviciosa gaputa narisgo pay dagiti kalkalsada a pagdalyasatan sadiay tapnu maipadanon ti tulong.
Naka-alerto met dagiti otoridad nga agwanwanawan ken mangwaknit kadagiti kalkalsada sadiay kadagiti mapaspasamak nga panagreggaay nu sadinno karaman a nakairekkep iti agdama ti Abra-Kalinga Road ken Abra-Ilocos Norte Road .
Agtultuloy met ti rescue operation nga isaysayangkat dagiti otoridad tapnu masarakan ti bangkay ti bangkay ti maysa a lalaki a mapapati nga naiyanod sadiay Malanas, River.
Daytoy ket kalpasan a nasarakanen itay agsapa sadiay Santa, Ilocos Sur ti bangkay ti 57-anyos a ni Joseph Barbosa nga immunan a naipadamag a naiyanod idi Hulyo 29.
Malaksid pay iti dayta, sinuspindir met ni Abra Governor Joy Bernos ti trabaho kadagiti ahensia ti gobierno ken klase ti pribado ken parapubliko a pagadalan sadiay nga epektibo ita nga aldaw, Agosto 3.
