BAGUIO CITY – Naideklara ti state of calamity iti munisipyo ti Paracelis sadiay Mountain Province gapu iti nakaro nga epekto ti El Niño wenno tikag.
Sigun kenni iti maysa a konsehal ti Paracelis, inrekomendar ti Municipal Disaster Risk Reduction and Management Council (MDRRMC) ti panakaideklara ti entero a munisipyo iti state of calamity gapu iti tikag.
Nailanad iti resolusyon ti MDRRMC a malaylaylayen dagiti mula sadiay gapu iti mapaspasaran a tikag ken nagresulta daytoy iti nakaro a dadael iti sektor ti agrikultura.
Kinuna ti konsehal a saan laeng nga iti agricultural products a marikrikna ti epekto ti tikag ngem ketdi, uray pay iti poultry, livestock ken fishponds a katukad ti 70 percent iti pakabuklan a dadael iti sektor ti agrikulta iti Paracelis.
Pinirmaan ti municipal board ken ti mayor ti munisipyo ti nasao a resolusyon idi March 26, aldaw ti Martes.
maipalagip a ti Paracelis ket maysa a second-class municipality iti Mt. Province nga agdepdependar iti agrikultura ken kaaduan a mula dagitoy ket mais.
