Sumangsango ita iti kaso nga Slight Physical Abuse ti maysa nga agtawen iti 38 a lalaki a residente iti San Vicente, Baguio City kalpasan a dinanugdanugna ti driver ti taxi a naglugananna itay laeng nabiit.
Sigun iti inisyal nga imbestigayson dagiti kameng iti pulisya, inlugan ti biktima ti nabarbartek a suspect manipud Baguio Memorial Chapel agingga iti Purok Panta San Vicente, Baguio City.
Dumanon iti P121 ti kasapulan a bayadan wenno plete ti suspect ngem 120 laeng ti imbayad daytoy.
Agparparang nga iti baet a kurang ti imbayad ti suspect ket nagkiddaw pay daytoy iti barya ngem inlawlawag ti biktima a kurang pay iti piso ti imbayad ti suspect kenkuana.
Sigun iti report, saan a kayat ti biktima a kumaro pay ti sitwasyon rason a nangisubli lattan daytoy iti P20 iti suspect.
Nupay kasta, nilayatan latta ti suspect ti biktima sakbay a dinanogna ti rupa, makanawan nga abaga ken ti ima daytoy.
Agparparang metlaeng iti imbestigasyon a saan a sinardengan ti suspect a dinanugdanug ti biktima agingga a nagpakaasi daytoy.
Kasaruno dayta, bimmaba metlaeng ti suspect iti lugan bayat a dagus metten a pimmanaw ti biktima.
Kalpasanna, nagreklamo ti biktima iti barangay San Vicente ngem saan a naballigi ti ammicable settlement ken naipaayan daytoy iti certificate to file action.
Ti biktima ket agtawen iti 56, ken residente iti Central Fairview, Baguio City.//Bombo Noveh Organo
