BAGUIO CITY – Pimmusay ti maysa a karpintero bayat a nadangran ti dua pay a kadwana iti panaka-uram ti abong-abong dagitoy sadiay Ciudad Grande, Phase 2, Bakakeng, Baguio City idi rabii ti Sabado, March 7.
Nabigbig ti pimmusay a ni Emam Mamposte, residente ti Caba, La Union bayat a nabigbig dagiti nadangran a da Abraham Rivera ken Ricky Ebarlin.
Sigun kenni FO3 Ramon Maguinsay Jr., imbestigador ti Bureau of Fire Protection – Baguio, napasamak ti uram iti alas-10:31 ti rabii iti abong-abong a kaabay ti construction site a pagtatrabahuan dagiti biktima.
Kinunana a napasamak ti uram bayat a matmaturog dagiti biktima ken idi nadiskobre dagitoy ti uram ket dagusda a rimwar.
Nupay kasta, dinakamatna a posible a saan a dagus a nakaruar ti pimmusay a biktima gapu iti kapartak ti panagwaras ti apoy.
Sigun pay kenkuana, posible a timmaud ti uram iti nabaybay-an a lutlutuen dagiti biktima iti kusina dagitoy.
Maipasidong met iti otopsiya ti bangkay ni Mamposte bayat a nakaruaren iti pagagasan ti maysa kadagiti nadangran.
Mapattapatta pay a P20,000 ti danyos iti nasao nga uram.
