BAGUIO CITY – Napadayawan dagiti nagduduma a barangay iti rehiyon Cordillera para iti Kalinga at Inisyatiba Para sa Malinis na Bayan (KALINISAN) sa Bagong Pilipinas Program para iti maika-dua a kwarter iti agdama a tawen.
Ti nasao a programa ket addaan ti tallo a components: umuna ti Barangay Road Clearing Operation (BARCO) a panggepna a mangipaay ti natalged a pagnaan iti publiko babaen iti panangipasigurado iti orderly ken well-maintained streets ken kalsada.
Maika-dua ket Barangay at Kalinisan Day (BARKADA) wenno community-based clean-up drive program a panggepna a pagbalinen ti komunidad a natalged ken nasalun-at a pagnaedan.
Maudi ket Halina’t Magtanim ng Prutas at Gulay (HAPAG) sa Barangay Project a panggepna a mangaramid iti sustainable green edible spaces ken ad-adda pay a panagmula ti kayo iti komunidad.
Maipalagip a nangipaulog ti Department of the Interior and Local Government ti Memorandum Circular No. 2024-001 a mangbilbilin kadagiti amin a barangay iti intero a pagilian a mangisayangkatda ti clean-up drive activity kas paset ti pannakarambak ti National Community Development Day ken kas panagsuportar iti panakaiyusuat ti KALINISAN sa Bagong Pilipinas Program.
Ti Kalinisan Program ket mangikagumaan a mangpatibker iti amin a panagregget ti gobyerno a mangmentinir ken mangipaay iti nasalun-at ken natalged nga aglawlaw babaen iti nagduduma a lokal a gobyerno ken panangipalubos iti panakaipaset ti komunidad kas mainaig iti “Bayanihan” tradition.
