BAGUIO CITY – Nasapa a pinagsaganaan ti lokal a gobyerno ti Baguio ti implementasyon manen ti General Community Quarantine iti entero a Cordillera.
Iti eksklusibo nga interview ti Bombo Radyo Baguio, kinuna ni Mayor Benjamin Magalong a dua a lawasen ti napalabas manipud nangrugi nga agsagana ti Baguio LGU babaen iti nairtengan nga implementasyon ti panagsuot ti face mask ken face shield ken ti nairtengan manen a pagalagadan iti border control iti BLISTT Area tapnu makontrol pay ti garaw dagiti tattao.
Sigun kenkuana, mangbusbus ti city government iti P1.1-M para iti makabulan a barangay bubble, no sadino, ditoy a ma-census dagiti vulnerable wenno dagiti naririsgo iti COVID-19 kadagiti babbarangay.
Napagnumuan pay a makanselar ti Panagbenga 2021, maksayan dagiti dumar-ay iti PMA Alumni Homecoming iti agingga 100 laeng a partisipantes, ti panakaipawil ti iruruar iti pagtaengan dagiti 14-anyos nga agpababa ken 65-anyos nga agpangato.
Inyunay-unay ti Contact Tracing Czar nga awan ti dakkel nga epekto ti GCQ iti ekonomiya ti Baguio gaputa ti laeng mabaliwan ket ti maikalikagum a dokumento iti border control ken mairtengan ti implementasyon ti minimum health standards.
Maipalagip a manipud iti Health Declaration Form ket kasapulanen a Medical Certificate ti iparang dagiti dumalan iti border control ti BLISTT Area mangrugi inton Lunes.
Karaman kadagiti manamnama a maipatungpal iti siudad kabayatan ti GCQ ket ti deployment ti telemedicine, panakaipatungpal ti low cost a whole testing ken antigen testing.
Maipatungpal manen ti liqour ban, maisubli ti 12 midnight to 4AM a curfew, mabaliwan ti quarantine pass, mapagbalin a 30% capacity dagiti mass gathering ken wedding ceremony ken maipawil ti biking iti Burnham Park.
Manamnama metlaeng a mairtengan ti border control iti nagbeddengan ti Benguet ken Mountain Province.
Impetteng pay ni Mayor Magalong a no makontrol ti panaggaraw dagiti tattao ket makontrol met ti panagngato dagiti kaso ti COVID-19.
