BAGUIO CITY – Maiyaw-awis kadagiti bisita ken turista dagiti lima nga waterfalls sadiay Bakun, Benguet para kadagiti same-day visitors.
Karaman ditoy ti Tekip, Pattan, ken Pikaw Falls iti Barangay Poblacion ken ti Mangta ken Patpat Falls iti Barangay Sinacbat, Bakun.
Nasken a makikoordinar laeng dagiti same-day visitors iti Bakun Municipal Tourism Council Facebook Page sakbay ti panagbisitada kadagiti falls wenno dissuor.
Nasken pay nga agrehistro dagiti bisita iti Bakun Tourist Information and Assistance Center iti Sinipsip, Gambang, Bakun, Benguet ken nasken nga iparangda ti valid ID ken vaccination card wenno vaccination certificate sakbayda nga sumrek kadagiti pagpasyaran.
Nainget nga ipalpalagip met ti Bakun Municipal Tourism Council dagiti maiparit nga aramiden kas iti panangiwara iti basura; panagisuot iti saan a disente a bado; panangdadael wenno panagsurat kadagiti kayo, bato, istruktura wenno markers; panagimet ti igam wenno anyaman a hunting equipment; panangitugot iti arak; panangdadael kadagiti mula ken panangpatay kadagiti ayop; panangipuslit wenno smuggle kadagiti mula wenno ayop; saan a mangrespeto iti cultural practices ti komunidad; panagpuor iti campsite ken obserbasyon ti ‘waste in, waste out’ policy.
