BAGUIO CITY – Nakasaganan dagiti nagduduma nga aktibidad para iti information, education and communication campaign seknan iti maisaksakad nga otonomiya ti Cordillera kagiddan ti panakarambak ti Cordillera Month.
Maipalagip a tinawen ket maramrambakan ti Cordillera Month iti bulan ti Hulyo.
Iti panakiuman ti Bombo Radyo Baguio, kinuna ni Regional Development Council – Cordillera Secretary Stephanie Christiansen nga aramatenda ti entero a bulan ti Hulyo tapnu maisakad ti matartarigagayan a regional autonomy agingga iti national level.
Kinunana a giddananda daytoy iti panangdanunda met kadagiti komunidad tapnu maimpormaran dagitoy ken maaddaan dagiti umili iti umdas wenno naan-anay a panaka-ammo seknan iti otonomiya para iti Cordillera.
Umap-apela met daytoy kadagiti umili tapnu dumar-ayda no adda dagiti IEC campaign dagiti barangayda seknan iti maisaksakad nga otonomiya ti Cordillera ken makipasetda kadagiti diskusyon.
Aw-awisenna pay dagiti addaan ti koneksion iti internet tapnu bisitaenda ti FB page a ONE Cordillera tapnu agbasa kadagiti ipabpablaakda nga impormasyon ken makipaset iti panagsungbat kadagiti survey wenno question and answer mainaig iti otonomiya.
