Kidkiddawen ti lokal a gobyerno ti Buguias ti panaganos dagiti biaheros kagiddan ti mapaspasaran a nailet a gunay ti trapiko iti sumagmamano a paset ti kalsada iti Buguias ken Bakun, Benguet.
Kasaruno daytoy ti pannakailukat ti maysa a linya ti alternatibo a kalsada idiay Pilando Lengaoan Section ita nga aldaw.
Makita kadagiti naipablaak a ladawan iti social media ti attidog a pila ti lugan manipud KM. 75, Pilando, Gambang, Bakun agingga idiay KM. 73, Saclalan, Amgaleygey, Buguias.
Maipalagip nga itay nabiit ket nargaay ti Pilando Road rason a kinasapulan ti transfer ken pannagna dagiti biahero iti dadduma nga alternatibo a ruta.
Gapu iti binnadang system wenno panagtitinnulong dagiti opisyales, volunteers ken umili ket nakaaramidda ti bassit a pagnaan iti makinngato a paset ti nargaay a Pilando Road babaen iti pammalubos ti akin sanikua bayat a maur-uray ti kongkreto a solusyon iti daytoy.
