BAGUIO CITY – Agtultuloy ti nainget a kampanya ti Police Regional Office Cordillera kontra iti iligal a droga iti rehiyon.
Kasaruno daytoy ti panakakemmeg ti dua a drug personalities iti nagsina nga operasyon dagiti otoridad idiay Apayao ken siudad ti Baguio idi laeng kalman, Hunyo 6.
Sadiay Apayao, nakemmeg ti 32-anyos a contruction worker gapu iti panangilako-na ti walo a pakete ti maatap a shabu nga agdagsen ti 0.28 a gramo ken agbalor ti P1,904.
Nadiskobre pay dagiti nagduduma a drug paraphernalia iti pagtaengan daytoy.
Iti sabali nga operasyon, natiliw ti 31-anyos a construction worker metlaeng idiay Sariling Sikap, San Carlos Heights gapu iti panaglabsingna iti Republic Act 9165 wenno Comprehensive Dangerous Drugs Act of 2002.
Kabayatanna, nadiskobre ti 2,500 a pidaso ti marijuana seedlings a naimula iti 5 square meter a kalawa ti daga ken agbalor ti P100-K sadiday Brgy. Bulalacao, Tacadang, Kibungan.
Ti nasao a mula ket dinadael dagiti maseknan a kameng ti otoridad ken daduma pay a yunit dagitoy.
Agtultuloy pay ti nainget nga operasyon dagitoy para iti panakaduktal dagiti daduma pay a marijuana plantation sites ken cultivators iti nasao a lugar.
