BAGUIO CITY – Linawlawagan ti Department of Health (DOH) – Cordillera a saan nga iti opisinada a nagtaud ti datus nga inruar dagiti national media idi kalman seknan iti COVID-19 cases iti Baguio City a naireport a dimmanon iti 121.
Maibasar met iti datus ti Baguio LGU, dumanon laeng iti 18 ti baro a kaso ti COVID-19 a nailista ti siudad idi kalman, Enero 27 nga adayo a naiduma iti datus a nairuar iti national news.
Impetteng ni Dr. Ruby Constantino, regional director ti DOH-Cordillera a manipud iti umuna a lawas ti agdama a bulan ti Enero ket saan a pulos a nakailista ti Baguio City iti nasursurok iti 100 a kaso ti COVID-19.
Kinunana nga 82 laeng ti kangatuan a kaso ti COVID-19 a nailista ti Baguio iti uneg ti maysa nga aldaw.
Inyunay-unayna a dagiti 18 a kaso ket impasidongda iti biripikasyon sakbayda nga inreport iti publiko.
Nupay kasta, dinakamat ni Dr. Constantino a manarimaanen ti panangduktalda iti nagtaudan ti naireport iti national news a bilang ti kaso ti COVID-19 iti siudad idi kalman.
