Impakaamo ti Korte Suprema iti maysa a pangngeddeng a masapul nga adda nalawag a panggep a mangdangran iti dignidad ti ubing tapno maibilang a “child abuse” wenno panangabuso iti ubing.
Ti desision ti SC Second Division nga insurat ni Associate Justice Jhosep Lopez ket pinatalgedanna ti panangukom iti maysa nga ama gapu iti panangtedna iti naranggas ken nalabes a disiplina iti 12-años nga anakna a babai ken 10-años nga anakna a lalaki.
Sigun iti nasao a korte, kinabkabil ti ama dagiti annakna manipud 2017 agingga 2018.
Ginuyod ti ama ti buok ti anakna a balasang, kinabilna iti kayo nga addaan ti lansa, binaotna ti dua nga ubbing babaen ti dustpan, ken inlunodna ida.
Kinuna ti Korte Suprema a nakapungtot ti ama iti anakna a babai idi Setiembre 22, 2017 gaputa saanna a kinnan ti taraon iti pangaldawna, bayat a dinangranna ti anakna a lalaki idi Pebrero 21, 2018 idi kurang ti kuarta nga inurnongda kadagiti “coin banks.”
Kas panangidepensar, kinuna ti amana a ti tignayna ket mangdisiplina laeng kadagiti annakna.
Nupay kasta, napaneknekan ti regional trial court ken ti Court of Appeals (CA) a nagbasol daytoy iti panaglabsing iti Special Protection of Children Against Abuse, Exploitation, and Discrimination Act.
Gapu iti dayta, nasentensiaan ti ama iti pannakaibalud iti uppat agingga innem a tawen iti pagbaludan ken naibilin nga agbayad kadagiti ubbing ti P180,000 kas “damage” kadagitoy.
