BAGUIO CITY – Umaw-awat iti atension ken pammadayaw ti pamay-an ni Board Member-elect Manny Fermin nga agyaman iti publiko kalpasan a nangabak daytoy iti kaleppas a 2025 midterm elections.
Iti social media postna, makita ni Fermin a nakatakder iti igid ti kalsada nga iggemna ti karatula a naglaon iti panagyamanna, a nakasabit iti tengngedna ken agpaypayapay daytoy kadagiti tattao ken motorista a lumablabas iti kalsada.
Ni Fermin ti maikatlo a nangabak a board member iti district II ti Benguet kalpasan a nakaala iti 63,405 a botos.
Maipalagip nga idi agkamkampanya metlaeng daytoy ket inaramidna ti kapadana nga estratehiya, nga imetna ti karatula nga agdawdawat iti tulong bayat a magmagna daytoy iti nagduduma a paset ti Benguet.
Ni Fermin ket three-termer a mayor ti Kapangan, Benguet sakbay a timmaray iti kina-board member ti district II ti Benguet.
