Impaganetget ni Senador Raffy Tulfo a naitantan dagiti adu a napapateg a gakat gapu iti gulo a mapaspasamak iti Senado.
Sigun kenkuana, nakalidliday nga adu dagiti gakat a nakasagana para iti sponshorship ngem agtululoy a maitantan gapu iti gulo ti Senado.
Sigun pay iti senador, kasapulan a maisayangkat ti transparent nga imbestigasyon kadagiti napasamak ken rummuar ti kinapudno tapno agsubli iti normal ken aramidenda ti trabaho dagitoy.
Kabayatanna, binigbig ni Senador Tulfo ti panangsuspender ti Ombudsman kenni Acting Senate Sergeant-At-Arms Mao Aplasca a nangaklon a daytoy ti immuna a nagpaputok ti paltog.
Mainaig iti dayta, impetteng pay ti nasao nga opisial a rumbeng met a sungbatan ti kameng ti National Bureau of Investigation (NBI) ti inaramidda a panangpaputok kadagiti kameng ti OSAA.
Innayon ti senador a masapul nga agtalinaed a nangato ti integridad ken kredibilidad ti Senado, no iti politika ken bukod a pagimbagan.
