Pagam-amkan ita ti Department of the Interior and Local Government(DILG) ti narco politics gapu iti posible a panakimpluwensya ti 2025 elections kadagiti iligal a mapaspasmak iti offshore gaming operators iti pagilian.
Gapu iti dayta, nagballaag ni DILG Secretary Benjamin Abalos Jr.seknan iti posible a panangpondo dagiti illegal Philippine Offshore Gaming Operators kadagiti agngayangay iti umay a midterm elections.
Kasaruno paylaeng dayta ti naduktalan a koneksyon ni suspended Bamban, Tarlac Mayor Alice Guo kadagiti kontrobersyal nga aktibidad iti Philippine Offshore Gaming Operators(POGO) hub iti nasao a probinsya.
Nupay kasta, impasigurado ni Abalos nga iningetanen ti Department of the Interior and Local Government (DILG) ken ti Philippine National Police (PNP) ti kampanya ken panagimbestigar dagitoy kontra iti nasao a gaming operator tapno maliklikan ti panagtaray dagiti pulitiko nga adda ti pakainaiganna kadagiti iligal nga aktibidad daytoy.
Kagiddan dayta, impaganetgetna nga addaan ti bileg ti Office of the Ombudsman ken ti Sangguniang Panlalawigan a suspindiren dagiti opisyales a konektado kadagiti nasao nga iligal nga aktibidad.
Kabayatanna, uppat a pulo ket tallo laeng a Philippine Offshore Gaming Operators(POGO) ti pinalubusan ti Philippine Amusement and Gaming Corporation (Pagcor) nga agoperate sadiay Metro Manila ken Cavite.
