BAGUIO CITY – Inaklon ti DOH-Cordillera a marigrigatanda ita nga agala ti impormasyon seknan iti panagpositibo iti COVID-19 dagiti kadate ken personnel ti Philippine Military Academy (PMA).
Sigun kenni DOH-Cordillera regional director Dr. Ruby Constantino, agtataud laeng iti City Health Services Office ti impormasyon a maal-alada kadagiti nasao a kaso gaputa ti nasao nga opisina ti makikokoordinar iti akademya.
Kinunana a saan a daytoy ti umuna a gundaway a narigatanda nga agala ti impormasyon iti uneg ti PMA.
Imbinglayna nga idi adda ti napasamak a diarrhea outbreak iti PMA ket saanda a napalubusan a sumrek sadiay.
Inaklonna pay a saanda nga ammo ti pasilidad a nakaipasidongan iti isolation ken quarantine dagiti kadete ken personnel a nagpositibo iti COVID-19.
Dinakamatna nga iti maikadua a lawas ti Disyembre ti napalabas a tawen ket nangipatungpal ti PMA iti aggressive testing no sadino, maysa ti nagpositibo manipud kadagiti 150 a naipasidong iti swab test.
Innayonna nga idi Disyembre 22 ket nakaawatda ti surat manipod iti akademya nga agkidkiddaw ti kanayinan a 100 swab test kits.
Sigun kenni Dr. Constantino, naamuanda laengen a nangipatungpal ti Task Force ti Philippine Coast Guard iti aggressive testing kadagiti amin a kadete ken personnel ti PMA, pakairamanan dagiti waiters ken cooks sadiay.
Dinakamatna a manipod iti naipatungpal a 1,000 swab testing ket 53 ti nagpositibo iti COVID-19 kadagiti kadete, 16 kadagiti waiters ken tallo a cook.
Kinunana a nagkiddaw manen ti akademya iti 1,000 a swab test kits para iti contact tracing dagiti nakapulapol ti 72 a nagpositibo iti coronavirus.
Gapu iti daytoy, kidkiddawen ti DOH-Cordillera ti panangited ti PMA iti impormasyon kadakuada tapnu met maamuanda ti kasasaad ti akademya iti COVID-19 ken tapnu matulonganda daytoy.
