Binallaagan ni alyas Glen, maysa a mannalon idiay Madaymen, Kibungan, Benguet dagiti padana a mannalon a bantayanda ti mula dagitoy.
Kasaruno daytoy ti insidente ti panagtakaw iti mula a nairekord idiay Sitio Topinao Colili, Masala, Madaymen, Kibungan, Benguet.
Iti exclusive interview ti Bombo Radyo, kinuna ni alyas Glen, sumagmamano kadagiti mulana a repolyo (wonderball) ket kinurta dagiti saan pay a nabigbig a suspek.
Dinakamatna a saan laeng a ti mulana a repolyo ti kinurta dagiti agtatakaw gapu ta nakurta metlaeng ti mula dagiti dua pay a padana a mannalon.
Sigun kenni alyas Glen, mapatta-patta a nasurok iti lima gasut a kilo ti repolyo ti kinurta dagiti agtatakaw manipud iti tallo a disso ti pagmulaan.
Iti patta-patta ni alyas Glen ket nasurok iti P31-K ti gatad dagiti natakaw a repolyo gapu ta dumandanon iti P55 agingga P62 ti presyo ti tunggal kilo ti repolyo iti agdama.
Mamati daytoy nga idi rabii ti Nobyembre 2 a natakaw dagiti mulada.
Inlawlawagna nga asideg iti kalsada ken adayo iti babbalay ti nakaimulaan dagiti repolyo.
Patien pay ni alyas Glen a dagiti nagtakaw kadagiti mulada ket nagusar iti lugan wenno motorsiklo.
Impeksana nga apitenda koma dagiti mulada inton umay a lawas ngem naun-unayan dagitoy.
Kinuna ti maseknan a mannalon a saan a daytoy ti kaunaan a gundaway nga adda ti natakawan ti mula iti nasao a lugar agsipud ta itay kallabes ket adda metlaeng ti natakawan iti mula nga strawberry.
