BAGUIO CITY – Naituding a mabakunaan kontra iti kamuras ken polio ti nasurok 337,700 a maladaga ditoy rehiyon Cordillera.
Paset daytoy ti nationwide Measles Rubella-Oral Polio Vaccine Supplemental Immunization campaign ti Department of Health (DOH) a mangrugi inton October 26 agingga November 25 ti agdama a tawen.
Panggep ti aktibidad a masalwadan dagiti ub-ubbing kontra iti kamuras ken polio kagiddan ti mapaspasaran a COVID-19 pandemic.
Sigun kenni DOH-Cordillera Immunization Program Coordinator Joycelyn Rillorta, puntiryada a bakunaan kontra iti measles rubella ti 182,000 nga agtawen iti 0-59 month old children ken ti nasurok 155, 700 nga agtawen ti 9-59 month old nga ubbing kontra iti polio.
Kinunana a maisayangkat ti panagbakuna kadagiti health centers, rural health units, barangay health stations ken private clinics wenno dagiti outpatient departments ti pagagasan ken dadduma pay.
Impanamnamana pay a masurot dagiti health ken safety protocols kabayatan iti panakaisayangkaat ti nasao nga aktibidad.
