BAGIUO CITY – Agtultuloy ti panangited ti Land Transportation Franchising and Regulatory Board (LTFRB) iti permit kadagiti parapubliko a jeep ditoy siudad ti Baguio para iti panagbiahe dagitoy.
Iti interview ti Bombo Radyo Baguio kenni Police Major Oliver Panabang, dadaulo ti Traffic Enforcement Unit ti Baguio City Police Office (BCPO), 516 a parapubliko a jeep ditoy Baguio ti inyendorsoda iti LTFRB-Cordillera a maipaayan iti permit nga agbiahe.
Kinunana nga iti kaudian nga update manipud iti LTFRB-Cordillera ket nasurok iti 400 parapubliko a jeep ti Baguio ti naipaayanen ti nasao nga opisina iti permit.
Sigun kenkuana, adda pay ti nasurok 200 a parapubliko a jeep a nasken a maiproseso ken maipaayan ti nasao a permit.
Inlawlawagna a no maipaayan amin iti permit dagiti 516 a jeep ket umdas dagitoy a mangakomodar kadagiti pasahero nga agtaud iti nagduduma a babbarangay ti siudad.
Kagiddan iti daytoy, umap-apela ni Major Panabang a no mabalin ket ipalubosti Land Transportation Office (LTO) ti panagbiahe dagiti parapubliko a jeep ditoy siudad a saan pay a naipaayan ti permit manipud iti LTFRB ken ti laengen aramaten dagitoy ket ti special permit nga inted ti BCPO.
Inlawlawagna a kasapulan ti panagbiahe dagiti nasao a jeep nangruna ta kagudua ti laonen dagitoy ken innaldaw ti biahe tapnu laeng adda ti pagluganan dagiti tattao.
Dinakamatna pay a napintas no adda metlaeng ti resolusyon manipud iti lokal a konseho ti Baguio a maisumitir iti LTO a mangkiddaw iti saan pay dagitoy a panangtiliw kadagiti parapubliko a jeep ditoy Baguio agingga a saan pay a naipaayan iti umno a permit amin dagitoy manipud iti LTFRB.
