BAGUIO CITY- Dumanonen iti 503 a drug personalities ti natiliw iti anti-drug campaign iti rehion Cordillera nga insayangkat dagiti anti-narcotic agents manipud Enero agingga Nobyembre ti agdama a tawen.
Sigun kenni PDEA-Cordillera Regional Director Gil Cesario Castro, resulta daytoy ti panakaisayangkat ti 636 nga anti-illegal drug operations.
Impannakkelna a nagresulta metlaeng dagiti nasao nga operasyon iti panakakumpiskar ti nasurok P1.67-B a gatad ti maiparit a droga ken panakaipila ti 669 a kaso, partikular ti panaglabsing iti Comprehensive Dangerous Drugs Act of 2002.
Dinakamatna a karaman kadagiti natiliw nga indibidual dagiti nakalista a top drug personalities ken illegal drug smugglers malaksid pay kadagiti marijuana cultivators a mangilalaok iti marijuana by-products kadagiti lakoda a natnateng.
Nainget met ti panangtutuk ti PDEA iti Barangay Drug Clearing Programken iti panakawanawan dagiti drug personalities iti rehion malaksid iti dadduma pay a kampanya kontra iti iligal a droga iti rehion nga idadauluan ti opisina dagitoy.
Impasiguradona metlaeng nga ituloy ti PDEA-Cordillera ti panagtrabahoda tapnu masustinir ken maituloy iti sumaruno a tawen dagiti naaramidanda ita a tawen iti kampanya kontra iti iligal a droga.
Kabayatanna, impannakkel met ti Police Regional Office Cordillera a nagbalin a generally peaceful ti rehion manipud Enero agingga Nobyembre ti agdama a tawen kalpasan a nailista ti 26 percent a panagbaba iti bilang dagiti napasamak a krimen manipud iti kapada a panawen idi napalabas a tawen.
Impannakkel pay dagiti yunit ti Armed Forces of the Philippines a nakadestino ditoy Cordillera nga agbalballigi ti “whole of nation approach” tapnu magibusanen ti local communist armed conflict iti rehion.
