BAGUIO CITY – Dumanonen iti 98.19 percent kadagiti first priority group iti COVID-19 vaccination program ditoy Baguio City ti nabakunaan kontra iti nasao a sakit.
Sigun kenni City Health Officer Dr. Rowena Galpo, pakabuklan nga 8,889 ti nabakunaanda a health workers ken frontliners manipud iti 9,053 a karaman iti first priority group ti COVID-19 vaccination program.
Dinakamatna a naaramatda amin a 8,885 a vials ti bakuna kontra iti COVID-19 a naipaay para iti siudad.
Maipalagip nga idi kalman ket nangrugi metten ti panagbakuna ditoy Baguio kadagiti 18-anyos agingga 59-anyos nga addaan ti comorbidities wenno sakit.
Innayon pay ni Dr. Galpo a sumarunon to dagiti senior citizens apaman a makasangpet ita a bulan ti naituding a bakuna kontra iti COVID-19 para kadagitoy.
