BAGUIO CITY – Impaluspos ti lokal a gobyerno ti Baguio City ti nasurok P1-M a pondo a naiwaras kadagiti munisipyo sadiay Batangas a naapektaran iti panagbettak ti Taal Volcano.
Iti interview ti Bombo Radyo kenni Engr. Bonifacio Dela Peña, City Administrator ti Baguio, kinunana a rinugiandan idi kanikadua ti panangipaay iti nasao a tulong kadagiti nagduduma a munisipyo ti Batangas Province.
Dinakamatna a nabingay ti nasao a pondo kadagiti walo a municipal governments ken naipaay ti tulong babaen iti cheke nga inawat dagiti maseknan nga opisyales.
Innayonna a nakitada ti dakkel a dadael nga intunda ti kalamidad kadagiti ili sadiay Batangas.
Sigun pay kenni Engr. Dela Peña, maaramat ti intulongda a pondo para iti rehabilitasyon dagiti nadadael a pasdek iti nasao a probinsia.