BAGUIO CITY – Im-imbestigaran ita dagiti otoridad ti pakabigbigan dagiti cultivators dagiti marijuana plants a pinarut ken inuramda iti tallo a nagsisina a pagmulaan sadiay Sagubo, Kapangan, Benguet.
Iti interview ti Bombo Radyo kenni PCapt. Jerry Pangosfian, hepe ti Kapangan Municipal Police Station, kinunana a nasurok P336,000 ti gatad dagiti mula a marijuana a dinadael dagitoy.
Kinunana a dumanon iti 1,700 a pidaso ti marijuana plants ti pinarutda bayat a nakadiskobreda iti 500 a gramo ti marijuana seeds.
Kinumpiskarda met ti maysa nga air gun a napagbalin a caliber 22 rifle a nadiskobre iti kweba nga asideg iti nakaimulaan dagiti marijuana.
Inlawlawag ni PCapt. Pangosfian a posible a naguyugoy manen dagiti residente ti Kapangan nga agmula iti marijuana gapu iti panagngato ti presyo daytoy.
Nupay kasta, impeksana ti panakadismayana iti panakadiskobre dagiti marijuana plantation sites sadiay Kapangan gaputa naideklaran ti munisipyo a drug-free idi pay 2017.
Gapu iti daytoy, iyap-apelana ti panakibinnadang dagiti residente sadiay para iti naan-anay a panakaisardeng ti panagmula ti mairjuana sadiay Kapangan, Benguet.
