![](https://img.bomboradyo.com/baguio/2022/08/Traffic-Baguio.jpg)
BAGUIO CITY – Isaksakad ni sigud a House Speaker ken Marinduque Rep. Lord Allan Velasco iti kamara ti House Bill 31 wenno ti “No Garage, No Registration Act,” kadagiti urban areas.
Sigun kenni Velasco, nasken nga adda ti bukkod a garage wenno parking space sakbay a gumatang ken agparehistro ti lugan.
Babaen iti daytoy ket maksayan ti nailet a gunay ti trapiko ken ti nalipit nga espasyo kadagiti kalsada ken sidewalks a naaramaten kas paradaan dagiti lugan.
Karaman kadagiti maikonsidera nga urban areas ti Metro Manila, Angeles City, Pampanga; Bacolod City, Negros Occidental; Baguio City, Batangas City, Cagayan de Oro City, Cebu City, Dagupan City, Davao City, Iloilo City, Naga City ken Olongapo City.
Amin dagiti car owners manipud kadagiti nadakamat a lugar ket nasken nga agpirma iti affidavit nga addaan iti notary public tapno makumpirmar nu addaan dagitoy ti permanente a parking space para kadagiti gatangen da a lugan.
Ti affidavit ket maipila iti Land Transportation Office (LTO) para iti registration.
Makanselar ti lisensiya ti lugan ken mamulta iti P50-K dagiti car owners a maduktalan a nag-ulbod iti nasao a pagadalan.