BAGUIO CITY – Uma-awaten ti National Police Commission (NAPOLCOM) – Cordillera iti nominasyon para iti 2020 Search for PNP Model Family manipud kadagiti pulis ditoy rehiyon.
Sigun kenni NAPOLCOM-Cordillera Regional Director Editha Puddoc, panggep ti tinawen nga aktibidad a maiyunay-unay ti imahe a dagiti pulis ket family-oriented ken kayada pay a maipakita ti kinapateg ti kaadda ti napigsa a linnangen iti pamilya a katukad ti naballigi a panangprebentar iti kriminalidad iti kagimongan.
Silulukat ti 2020 Search for PNP Model Family iti amin a kameng ti pulisya nga addaan iti lehitimo wenno ampon, legal ti panaki-asawana, nagdennada iti asawana iti saan a bumaba iti lima a tawen ken nagserbi iti pulisya iti saan a bumaba iti lima a tawen.
Kinuna ni Director Puddoc a dagiti kwalipikado a pulis ket mabalin nga inominar dagiti empleyado ti lokal a gobyerno, non-government organizations ken dagiti dadduma a kameng ti pulisya a saan a kabagian ti mainominar a pulis.
Mailaban iti national level ti mapili a PNP Model Family iti regional level ken mabigbig dagiti mangabak inton Agosto kagiddan ti panakarambak ti anibersaryo ti NAPOLCOM.
Maipalagip nga iti 2019 Search for PNP Model Family iti national level ket nabigbig ti Tactay Family manipud Mountain Province kas fourth runner-up.
Iti nasao a panawen, ni PCapt. Pedro Tactay ti Deputy Chief ti Police Community Affairs Development Branch ti Mountain Province PPO.
