Nasayaat ti kasasaad dagiti OFW idiay Jerusalem kalpasan ti panangipatayab ti pagilian nga Iran ti missile ti ginasgasut a missile ken drone iti Israel itay nabiit.
Sigun kenni Bombo International News Correspondent Rex Marcelo Merino manipud Jerusalem, iti agdama ket nawaya dagiti tattao a rumuar ken magna kadagiti kalkalsada nu idilig kadagiti naglabas nga aldaw.
Dinakamat ni Merino a nabaelan ti Israel a nilapdan dagiti ginasgasut a missiles ken drones ti Iran babaen kadagiti iron domes, david’s sling, arrow two; ken Arrow three.
Iti baet daytoy, kidkiddawen ni Merino ti panangikararag iti dua a pagilian para iti linak ken kappia.
Maipalagip a nangipatayab ti Iran ti explosive drones ken missiles idiay Israel kas panangibalesda iti panangbomba ti Israeli warplanes iti Iranian Embassy idiay Syria idi Abril 1 ti agdama a tawen.//Bombo Marielle A.
