BAGUIO CITY – Mabalinen nga agala dagiti taxi ken Traditional Public Utility Jeepney operators ti Fare Matrix/Guide iti opisina ti Land Transportation Franchising and Regulatory Board (LTFRB) – Cordillera mangrugi inton bigat, Setyembre 22.
Para met iti Public Utility Buses, mabalin nga agalada ti fare matrix Setyembre 23.
Kabayatanna, urayen met dagiti modernized public utility jeepneys ti pammilin ti ahensiya.
Pinalagipan met ti LTFRB-Cordillera ti publiko nga ag-epektibo inton Oktobre 3 ti panagngato ti plete kadagiti parapubliko a lugan kas ti bus, jeep ken taxi.
Nasken nga agipaskil dagiti PUV operators ken drivers ti updated a fare matrix wenno fare guide iti uneg ti luganda tapno adda ti pagbasaran dagiti pasahero nu agbayadda ti plete.
Sigun iti ahensiya, istrikto a masurot ti “NO FARE MATRIX, NO FARE INCREASE”
Kasapulan laeng a mangiparang dagiti operators ken drivers ti photocopy ti kaudian nga OR/CR dagitoy, franchise validation, kopya ti provisional authority ken official receipt ti payment.
Dumanon iti P520 ti mabayadan tunggal case number, P50 tunggal yunit ken P40 para iti franchise Verification.
