BAGUIO CITY – Naduktalan ti panag-overpricing dagiti sumagmamano a pagtagilakuan ditoy lokalidad iti lako dagitoy nga alcohol kasaruno ti agtultuloy nga isyu iti COVID-19.
Sigun kenni DOH-Cordillera Regional Director Dr. Amelita Pangilinan, manipud kadagiti 27 a drug stores ken 6 a groceries nga impasidongda iti inspeksion ket naduktalan a siyam nga establishimiento ti nangipangina iti presyo ti lakoda a 70 percent solution ethyl alcohol.
Kinunana a nailako dagiti 250ml a 70 percent solution ethyl alcohol iti P45 iti baet a ti mabalin a kangatuan a presyo dagitoy ket P41.75.
Gapu iti daytoy, gimmatangda iti item nga addaan ti opisyal a resibo ken intedda iti Legal Office ti ahensia para iti panakaipaulog ti show cause order dagiti siyam nga establishimiento tapnu agpalawag dagitoy.
Naduktalanda metlaeng nga uppat a drug stores iti lokalidad ti nag-overpricing iti facemask kalpasan nga inlako dagitoy ti surgical mask iti P8 ken ti n95 mask iti P105.
Sigun pay kenni Dr. Pangilinan, adda dagiti nakita a mailaklako a modified facemask kas iti carbonated disposable facemask kadagiti pharmacies iti rehiyon.
Inlawlawagna nga iti pagaladagan ti Food and Drug Administration ket ‘non registrable’ dagiti nasao a facemask isut gapuna a kolektarenda dagitoy.
