BAGUIO CITY – Pakabuklan a P1.2-million ti gatad ti marijuana plants a nakumpiskar manipud kadagiti drug personality iti nagsina nga operasyon dagiti maseknan nga otoridad iti probinsiya ti Benguet idi Agosto 13, iti agdama a tawen.
Idiay La Trinidad, natiliw ti 54-anyos a vegetable porter gapu iti panaglabsingna iti Republic Act 9165 wenno ti Comprehensive Dangerous Drugs Act of 2002.
Nakumpiskar manipud kenkuana ti 0.37 grams ti maatap a shabu nga agbalor ti P2,516 babaen iti nagtinnulong a pwersa ti La Trinidad Municipal Police Station, Provincial Drug Enforcement Unit, ken Provincial Intelligence Unit.
Nailista metlaeng ti suspek kas Street Level Individual.
Kabayatanna, nadiskobre dagiti kameng ti pulisya, yunit ken maseknan nga ahensiya ti 6,400 grams ti dried marijuana leaves nga addaan ti fruiting tops ken 2, 000 a pidaso ti Fully Grown Marijuana Plants (FGMJP) nga aggatad ti P1,168,000 iti nagsina nga operasyon iti Sitio Bito ken Bakugan idiay Brgy. Tacadang, Kibungan.
Nadiskobre ti sabali pay a 400 a pidaso ti marijuana plants nga agbalor ti P80,000 idiay Sitio Damuco, Brgy. Kayapa, Bakun, Benguet.
Amin dagiti nadiskobre a mula ket nauram iti nakasarakanna a lugar.
Agtultuloy ladta ti nainget nga operasyon dagiti operatiba tapno maduktalan ti daduma pay a marijuana plantation sites iti nasao a lugar ken matiliw dagiti cultivator.
