BAGUIO CITY – Agtultuloy ti panangdalus dagiti otoridad kadagiti kabambantayan ti Kalinga manipud kadagiti marijuana plants.
Nagresulta daytoy iti panangdadaelda iti P132.52-M a gatad dagiti rinibribo a puon ti marijuana ken ginasgasut a kilo dagiti napagango a bulong ti marijuana manipud iti pito a pagmulaan sadiay Barangay Loccong ken walo a pagmulaan sadiay Barangay Butbut Proper iti munisipyo ti Tinglayan, Kalinga.
Naisayangkat ti operasyon iti sidong ti Oplan Fakut idi August 3-4, 2021 kadagiti nasao a pagmulaan nga addaan kalawa a 32,000 metro kwadrado.
Pinarut ken inuram dagiti otoridad ti 310,600 a puon dagiti dadakkel a marijuana nga aggatad ti P62.12-M manipud kadagiti nasao a pagmulaan sadiay Loccong ken Butbut Proper.
Nadiskobreda pay ti 420 a kilo dagiti napagango a bulbulong ti marijuana nga aggatad ti P70.4-M manipud iti maikapat ken maikapito a pagmulaan ti marijuana sadiay Loccong.
Kinuna dagiti otoridad a sakbay ti eradication operation ket nangisayangkat dagiti operating troops iti panagwanawan iti nasao a disso para iti posible a panakatiliw dagiti marijuana cultivators ngem napaay dagitoy.
Innayonda nga ituloyda ti panagbiruk, panagparut ken panang-uramda kadagiti marijuana plants iti rehion nangruna ita a panagtutudo, no sadino, napartak ti panagdakkel dagiti nasao nga iligal a mula.
Naisayangkat ti Oplan Fakut babaen iti nagtipon a pwersa ti Kalinga Police Provincial Office, RID/RPDEU/RSOG, 1503rd, 1505th ken 1501st RMFB15 PNPDEG SOU2 ken PDEA Kalinga.
