Nakumpiskar ti Philippine Drug Enforcement Agency (PDEA) ti P6.9 bilion a gatad ti iligal a droga bayat ti operasionna iti umuna a kuarter ti agdama a tawen.
Daytoy ket sigun kenni PDEA Director General Isagani Nerez iti press conference idi kalman.
Maibasar iti datos a dinakamt ni Nerez, dumanon iti 10,161 nga operasion ti insayangkat ti PDEA ken dadduma pay a pannakabagi ti linteg a nagresulta iti pannakakemmeg ti 13,497 nga indibidual ken pannakakumpiskar ti P6.9 bilion a gatad ti iligal a droga.
Kadagiti 13,497 a nakemmeg iti umuna a kuarter, tiniliw ti anti-illegal drug body ti 45 nga empleado ti gobierno, 22 nga elected government officials ken 5 nga uniformed personnel.
Malaksid iti dayta, natiliw metlaeng ti 49 a “target-listed” personalities, 24 regional “target-listed” personalities, ken uppat a drug group leaders bayat ti umuna a kuarter nga operasion iti agdama a tawen.
Kabayatanna, manipod idi Enero 1 agingga Marso 31, 2025, nakumpiskar iti operasion ti 1,056.40 a kilo ti dried marijuana leaves ken bricks, 927.44 kg ti shabu (crystal meth), 142.30 kgs ti marijuana fruiting tops, 95.01 kg ti marijuana stalks, 60.62 kg ti marijuana kush, 8.43 kg ti cocaine, 1,502,037 a pidaso ti marijuana plants, 11,305 a pidaso ti marijuana seedlings, ken 8,134 a pidaso ti ecstasy.
