BAGUIO CITY- Mangnamnama ita dagiti transport group iti Cordillera a mapatgan ti kiddaw dagitoy a manayonan ti minimum a plete iti P5 agingga P6.
Iti panakiuman ti Bombo Radyo Baguio, kinuna ni Pat Evangelista, presidente ti asosasyon dagiti transport group iti Cordillera ken Region 1, naituding a talantanen ti LTFRB-Cordillera ken transport group ti nasao a banag inton Hunyo 28.
Inaklonna a maragsakan dagitoy iti gundaway ken oportunidad nga impaay ti ahensiya kadakuada tapno ipeksada met ti agdama a parikutda para iti pannakasolbar daytoy.
Impetteng ni Evangelista a nu P3 laeng ti patgan ti LTFRB a panagngato ti minimum a plete ket pagyamananda latta daytoy.
Impaganetgetna met nga iti kanito nga awan ti ngumatoan ti plete ket posible a manayonan ti bilang dagiti drivers nga agsardeng nga agpasada nangruna ta agpangpangta a ngumato iti P100 ti presyo ti tunggal litro ti petrolyo iti sumarsaruno a lawas.
Dinakamat ni Evangelista a 30% aginggga 40% laeng a drivers ti agpaspasada iti agdama gapu iti agtultuloy a panagngato ti presyo ti petrolyo.
Kabayatanna, mangnamnama ni Evangelista a babaen iti pasetanna nga online forum ni Senador Win Gatchalian ita nga aldaw ket maidanonna ti pakaseknan dagiti transport group iti Cordillera.
Karaman ditoy ti saan a pannakairaman ti Cordillera ken Region 1 iti provisionary increase a naipatungpal laeng iti NCR, Region 3 ken Region 4.
