Kinuwestion ni Negros Occidental Representative Javi Benitez ti Sugar Regulatory Administration (SRA) nu apay nga intulokda ta sumrek iti pagilian a Pilipinas ti importasyon ti asukal a nangitunda iti P7.28 billion a pukaw iti sugar industry.
Iti privilege speech ni Benitez, dinakamatna nga impalubos ti Sugar Regulatory Administration babaen iti Sugar Order No. 8 ti importasyon ti 424,000 metric tons ti refined sugar a simmangpet idi Hulyo agingga Nobyembre idi napan a tawen imbes a 50,000 metric tons laeng ti inrekomendar ti Negros Occidental sugar leaders a maangkat.
Maipalagip nga idi Oktobre 2025, nangipatungpal ti Sugar Regulatory Administration iti moratorium wenno temporaryo a pannakaiparit ti panag-angkat iti molasses sugar agingga iti ngudo ti 2025 gapu iti panagbaba ti presyo dagiti locally produced sugarcane byproduct.
Idi Nobyembre 2025, pinalawa ti Sugar Regulatory Administration kadwa ti Department of Agriculture ti moratorium agingga Marso 2026.
Nupay kasta, idi Disyembre 2025, kinuna dagiti nadakamat nga ahensiya a kitkitaenda ti posibilidad ti panangpaattidog pay iti moratorium wenno saan a panag-angkat iti agingga ngudo ti 2026.
Sigun kenni Benitez, panpaneknekkan dagiti naipatungpal a moratorium a ti Sugar Regulatory Administration ket mangipatpatungpal iti solusyon iti problema nga isuda metlaeng ti nangaramid.
Innayonna pay a ti interbensyon ti House of Representatives babaen iti maysa nga imbestigasyon ti umno nga addang tapno masolusyonan ti nasao nga isyu.
