Nakakumpiskar manen ti Police Regional Office Cordillera Administrative Region (PRO-CAR) iti P8 million ti gatadna a marijuana kadagiti sangapulo ket uppat nga anti-illegal drug operations manipud Agosto 23 agingga Agosto 29 iti agdama a tawen.
Pakabuklan a 24,270 a puon ti dadakkel a mula a marijuana, 4,500 a pidaso ti marijuana seedling, 27,000 a gramo ti marijuana leaves ken fruiting tops ken 19.78 a gramo ti shabu nga aggatad iti P8.4 million ti nakumpiskar iti siudad ti Baguio, probinsiya ti Benguet ken Kalinga.
Pakabuklan met a walo a drug personalities a nabigbig kas street level individuals dagiti natiliw.
Dinayaw met ni Police Regional Office Cordillera Regional Director PBGEN David Peredo Jr ti outstanding performance dagiti pulis a mangdadael iti iligal a droga tapno maliklikan ti negatibo nga epektona iti rehiyon.
