BAGUIO CITY – Pabor ni Senador Ronald “Bato” dela Rosa iti nagbalin nga aksyon ti Philippine National Police nga amyendaran ti implementing rules and regulations (IRR) ti Comprehensive Firearms and Ammunition Regulation Act tapno mapalubosan dagiti sibilyan nga agtagikua wenno agala ti semi-automatic rifles.
Sigun iti senador, umado dagiti iligal a paltog nu maparitan ti publiko nga ag-access iti daytoy.
Immunan nga impeksa da Senador Risa Hontiveros ken Imee Marcos ti pannaka-amyendar ti Republic Act 10591.
Kabayatanna, impeksa met ni Senate President Juan Miguel Zubiri a masapul a mangipatungpal ti pulisya ti nainget a panagsukimat sakbay a mangipaayda ti lisensiya kadagiti agtagikua ti paltog.
Kiniddaw met ni Senador Francis Tolentino ti naun-uneg a panagadal partikular ti agbalin nga epekto nu mapalubosan dagiti sibilyan nga agtagikua wenno mangala ti semi-automatic rifles.
Sigun pay kenni Senador Robin Padilla, dagiti indibidual a mapalubosan nga agtagikua ti paltog ket masapul a reservists.
