BAGUIO CITY – Supsuportaran dagiti nagduduma nga establishimento ditoy Baguio ti pammilin nga impaulog ni Mayor Benjamin Magalong seknan iti saan a panaguneg dagiti turista ditoy siudad gapu iti pangta ti Delta variant ti COVID-19.
Sigun kenkuana, naawatan met dagiti agtagikua kadagiti establishimento ti nasao a pammilin.
Inlawlawagna a no saan pay a nangipatungpal ti siudad ti naing-inget a pagalagadan ket adda iti posibilidad nga agturong dagiti dadduma nga indibidua kadagiti lower risk classification areas kas ti Baguio City.
Kinunana nga iti agdama ket ngumat-ngato ti kaso ti COVID-19 iti siudad isu’t gapuna a nasken a malapdan daytoy.
Maipalagip nga impaulog ni Mayor Magalong ti pammilin iti temporaryo a panakaiparit ti panagturong dagiti turista ditoy siudad ti Baguio.
