BAGUIO CITY – Nangipaulog ti lokal a gobierno ti La Trinidad iti pammilin a pannakaipatungpal ti one-way traffic route iti Strawberry Farm Road sadiay Betag, La Trinidad manipud Abril 14 agingga Abril 17.
Nailanad iti executive Order No. 19-2022 a kadagiti nadakamat nga aldaw, agserbi kas entry point iti Strawberry Farm Road ti Benigno Aquino Jr. National Highway, Km. 6 – Betag Intersection ken paruar iti Pico-Puguis Road wenno iti Benguet AgriPinoy Trading Center Diversion Road babaen ti Agri-Pinoy Circumferential Road.
![](https://img.bomboradyo.com/baguio/2021/08/habagat-la-trinidad.jpg)
Magna met iti exit points iti Pico-Puguis Road wenno iti likod ti BAPTC Diversion Road babaen ti Agri-pinoy Circumferential Road dagiti sumrek manipod iti BAPTC Diversion Road .
Dagiti met sumrek manipud iti Pico-Puguis Road (Palmaville Area) ket magna iti exit point ti BAPTC Diversion Road ken maaaramat laeng ti Agri-Pinoy Circumferential Road kas exit route.
Naiyunay-unay met a saan a maaramat kas exit route ti Strawberry Farm Road .
Naipaulog ti nasao a pammilin tapnu maliklikan ti nadagsen a taray ti trapiko kadagiti nasao nga aldaw wenno iti Holy Week nu sadinno manamnama ti panagturong ti adu a bisita sadiay nangruna iti Strawberry Fields.