BAGUIO CITY – Agtultuloy ti panangpalagip iti 911 emergency responders kadagiti motorista para iti kanayon a panagganad dagitoy bayat ti panagsangbayda iti siudad.
Sigun kenni Rafael Paeng Valencia, dadaulo iti 911 hotline ti siudad, nakailistada ti sumagmamano a kaso iti vehicular traffic accident bayat ti nasantoan a lawas.
Dinakamatna nga adda ti renespondeanda a sangapulo ket tallo a mechanical defects iti masakupan dagitoy nu sadino gapu daytoy iti clutch wenno brake malfunction ken panagoverheat ti lugan.
Malaksid ti dayta, nakailistada pay ti dua a lugan a natumba wenno nabaliktad iti paset ti Asin Road.
Pakairaman pay ditoy ti maysa a pedestrian accident iti sangoanan ti Heavens Garden Memorial sadiay Loakan kalpasan a dinungpar ti maysa a motorsiklo.
Naiyuman pay kadakuada a dagus met a renespondeanda ti innem a self accident gapu iti nagalis a kalsada ken human error a naikairaman ti maysa a 10 wheeler truck a nangitunda iti nailet a gunay ti trapiko sadiay Marcos Highway itay laeng nabiit.
Karaman pay kadagiti narespondeanda ti panagdinungpar ti tallo a motorsiklo a nangitunda iti panakadangran ti ulo iti maysa kadagti biktima.
Gapu iti dayta, sangapulo ket maysa ti nailista a nadangran ken innem ditoy iti renespondeanda bayat a dagiti dadduma ket renespondean dagiti dadduma a maseknan nga ahensia.
Kabayatanna, maibasar iti SUMVAC medical and treatment report, innem ti nailistada a trauma cases gapu iti nasao nga aksidente, maysa a medical transport manipud ti ospital paturong iti residence dagitoy, ken uppat a medical emergency cases.
Malaksid pay iti dayta, karaman kadagiti retrieval operation nga impatungpalda ti panakaguyod dagiti uppat a lugan sadiay City Camp Lagoon iti napasamak a panakalayos sadiay nga intunda ti panakapullat iti drainage gapu iti basura.
Kabayatanna, nainget met ti panangipalagipda kadagiti motorista iti kanayon a panangikondisyonda iti lugan ken bagbagida tapno maliklikan dagiti kapada nga aksidente.//Bombo Raz pagoli
