Impetteng ni sigud a chief presidential legal counsel Salvador Panelo a dakkel a pukaw iti Marcos Administration ti panag-ikkat ni Vice President Sara Duterte iti gabinete ti presidente.
Ni Panelo ket sigud a legal counsel ni sigud a President Rodrigo Duterte ken nagserbi metlaeng kas spokesperson iti Duterte Administration.
Sigun kenni Panelo ti panag-ikkat ni Sara iti gabinete ni President Ferdinand Marcos Jr. ket gapu iti saan a nasayaat nga aglawlaw ken aramid dagiti kaalyado ti agdama nga administrasyon.
Kinuna ni Panelo a dagiti kaalyado ni President Marcos ket umapal kenni Vice President Sara gapu ta umuna daytoy iti pwesto para iti 2028 presidential race.
Impaganetget ti nasao nga opisyal a para kenkuana ket kurang ti panangidepensar ti presidente iti bise presidente kadagiti nagduduma nga isyu.
Innayon pay ni Panelo a ti susik iti nagbaetan da First Lady Liza Araneta-Marcos ken Vice President Sara ti maysa kadagiti rason iti panag-ikkatna.
Sigun pay iti sigud nga spokesperson ni Duterte a ni Harry Roque, ti bise presidente ti dadaulo ita ti oposisyon kalpasan a bimmagsak ti alyansa ti Marcos-Duterte a Uniteam.
