BAGUIO CITY – Rinugianen dagiti enforcers ti Land Transportation Office (LTO) – Cordillera ti panagaramat ti body cameras kabayatan ti panangisayangkatda iti mandatoda.
Sigun kenni LTO-Cordillera regional director Francis Ray Almora, babaen kadagiti nasao a body cameras ket adda ti pagkitaan iti panaglabsing dagiti masitar wenno matiliw a driver dagiti lugan, agbalin a lehitimo ti panagtiliw dagitoy ken masalwadan ti publiko manipud iti panagabuso dagiti enforcers.
Kinunana a gimmatangda ti 16 a body cameras para kadagiti personnel ti LTO-Cordillera a mangiyemplementar kadagiti linteg ti transportasyon kadagiti kalkalsada iti masakupan ti rehion.
Innayonna a kabaelan dagiti body camera nga i-rekord dagiti pasamak kas iti panaglabsing ti maysa a motorista sakbay pay a mapara dagitoy.
Dinakamatna nga epektibo ti nasao a kagawaan kadagiti aglablabsing iti linteg ti panagaramat ti seatbelt gaputa adda dagiti masitar gapu iti saanda a panagaramat ti seatbelt ngem apaman nga asitgan dagitoy dagiti enforcers ket nakakonektaren ti seatbelt dagitoy ken iyakusarda nga iligal ti panakatiliw dagitoy.
Impalagip ni Almora a nagduduma ti multa ti saan a panagaramat ti seatbelt, depende iti kita ti lugan ken iti posisyon ti naglabsing ngem kadawyan nga adda iti P1,000 agingga P3,000 ti multa iti umuna a panaglabsing iti Seat Belts Use Act of 1999.
