BAGUIO CITY – Mangnamnama ti Commission on Elections-Comelec CAR a kumamakam a mangisubmitir iti Statement of Contribution and Expenditures (SOCE) dagiti nangipila ti Certificate of Candidacy iti kaleppas mga May 2022 elections.
Iti interview ti Bombo Radyo Baguio kenni COMELEC Cordillera Spokesperson ken Tabuk City Election Officer Atty. John Paul Martin, kinunana nga agingga laeng iti oras ti alas singko ita nga malem nga akseptaren dagiti nagduduma nga local election officers iti rehiyon dagiti SOCE dagiti nagkandidato.
Sigun kenkuana daytoy ti maudi nga post-election activity sakbay a pormal a mairekkep ti May 9, 2022 national ken local elections.
Inyunay-unayna nga sinapataan dagiti nangpila ti COC idi Oktubre para iti election 2022 ti panangipilada iti SOCE, 30 nga aldaw kalpasan ti eleksion.
Inlawlawagna a karaman a mangipila iti SOCE dagiti nagsanod wenno nagwithdraw kabayatan ti panagkakampanya ngem saanen a makiddaw ti panangisubmitir dagiti nagsanod sakbay ti campaign period.
Imbinsana pay a kasapulan nga mailanad amin dagiti nabusbos ti tunggal kandidato kabayatan ti panagkakampanya ken nasken nga kompleto ti dokumento ken official receipt dagitoy.
Imballakadna met ti panakaipataw ti kaskenan nga multa wenno posibilidad a saan nga makangayngay kadagiti sumaruno nga eleksion dagiti saan a mangipila wenno saan nga kompleto ti SOCE dagitoy. \cgd
