BAGUIO CITY – Naipalubos ti panaglako sadiay Tuba, Benguet ti grupo dagiti agilaklako ti pailaw ken palibang ditoy lokalidad.
Iti interview ti Bombo Radyo Baguio, kinuna ni Agnes Montoya, dadaulo ti nasao a grupo nga impaay ni Tuba Mayor Clarita Sal-ongan ti pammalubos iti panaglakoda iti masakupan daytoy iti las-ud ti uppat nga aldaw.
Dinakamatna nga idi kalman, December 28 agingga inton tapos, December 31 ti naipalubos a panaglakoda iti sigud a pagpupwestuan dagitoy iti deppaar ti Marcos Highway.
Inyunay-unayna met a pailaw ken palibang laeng ti ilakoda tapnu matulongan dagiti umili a mangpasangbay iti baro a tawen a napnuan iti maris.
Iinnayonna a saanda nga ilakuan dagiti menor de edad ken adda dagiti pagalagadan a surutenda kas iti kaadda dagiti drum a naglaon ti danum ken dagiti fire extinguishers malaksid pay a masurot dagiti health and safety protocols kontra iti COVID-19.
Dinakamat ni Montoya a nagisimpadan idi kalman ken manamnama a mangrugidan nga agilako ita nga aldaw.
