BAGUIO CITY- Manamnama ti posible a bassit nga panagngato ti kaso ti COVID-19 iti Baguio City kadagiti sumaruno nga 10 nga aldaw.
Inwaragawag daytoy ti ni Mayor Benjamin Magalong kagiddan ti panagngato ti pannagaraw ti umili gapu kadagiti napalukayan nga quarantine ken entry protocols ti siudad.
Mangnamnama pay daytoy a saan unay a nangato ti mailista nga kaso wenno sumurok daytoy iti intudingda nga pagrukudan tapnu saan a mangitunda iti alarma ken mang-apektar iti agdama nga alert level status ti siudad.
Kinunana nga nababa pay iti naituding nga threshold ti agdama nga kaso ken kabaelan pay ti lokal a gobierno nga imanihar nu saan unay nga nangato ti mailista kadagiti sumaruno a 10 nga aldaw.
Inyunay-unayna pay nga nakasagana ti siudad iti kanito a mapasaran manen ti panagngato ti kaso kas maibasar iti nagbalin a kapadasan daytoy iti panakaimanihar ti kaso iti delta ken omicron variant.
Iti agdama ket nainget ti monitoringda iti mobility graph wenno pannaggaraw ti publiko nu sadinno naobserbarnda ti panagngato daytoy a manamnama met a sarunuen ti panagngato ti kaso iti COVID-19.
Nupay kasta, impettengna a maimanihar ti nasao nga banag la ketdi agtalinaed ti datus iti threshold wenno ti kapasidad ti siudad.
