BAGUIO CITY – Linawlawagan ti BENECO ti panagngato ti electric bill wenno babayadan iti kuryente dagiti nasurok 140,000 a member-consumers ti kooperatiba iti probinsia ti Benguet ken siudad ti Baguio.
Iti panakiuman ti Bombo Radyo Baguio, kinuna ni BENECO OIC General Manager Melchor Licoben nga idi paylaeng Mayo a napasaran ti panagngato ti babbayadan iti kuryente gapu iti nagduduma a rason.
Dinakamatna a dumanon iti 80 centavo tunggal kilowatt-hour (kWh) ti nginminaan ti electric bill isut gapuna a dagiti residential consumers a binulan nga agkonkonsumo ti 100 kWh ket manaynayon iti P80 ti electric bill dagitoy.
Inlawlawagna a resulta daytoy ti panagngato ti generation cost a baybayadan ti kooperatiba manipud kadagiti power suppliers a rason a ngimmato met ti singirda kadagiti member-consumers.
Impettengna nga epekto daytoy ti ngumatngato a pagkasapulan ti kuryente gaputa agrekrekober metten ti ekonomiya a nangitunda iti panagngina ti coal iti global market.
Innayonna a ngimmina metlaeng ti transmission cost gapu iti kanayonan nga ancillary charges ti National Grid Corporation of the Philippines (NGCP).
Gapu iti daytoy, kinuna ni Licoben a nangrugin ti panagsingir ti BENECO iti Incremental Currency Exchange Rate Adjustment (ICERA) ken iti Generation Rate Adjustment Mechanism a mandato ti Energy Regulatory Commission (ERC).
Impaganetgetna met a saan laeng a ti BENECO ti nangipangato iti babbayadan iti kuryente ngem ketdi, uray dagiti amin a member-consumers dagiti electric cooperatives iti entero a pagilian.
Nupay kasta, impasigurado ni Licoben nga awan ti mabingbingay ti BENECO iti nangato a singir ti electric bill a baybayadan dagiti member-consumers.
Kagiddan iti daytoy, inaklonna a saanna a maibaga no mabayag a mapasaran ti panagngato ti singir iti kuryente gaputa nakadependar ti presyo ti kuryente iti global market partikular iti presyo ti gasolina, coal ken forex.
