Agtultuloy a mabanbantayan dagiti sumagmamano a paset iti kalsada idiay Atok, Benguet kasaruno ti panakapasar iti panagtennag iti bato ken panagregga-ay iti daga partikular idiay KM 46 itay laeng parbangon a nakaitunda iti temporaryo a panagrekep daytoy.
Iti panakiuman iti Bombo Radyo kenni Atok Mayor Franklin Smith, karaman kadagiti critical areas nga imonmonitorda iti agdama ti KM 28 ken KM 29 babaen metlaeng iti panakitinnulong dagiti kameng iti Bureau of Fire Protection(BFP) ken ti Philippine National Police(PNP).
Imbinglay ni Mayor Smith a sakbay a simmangbay ni Bagyong Kristine, napakaammoanen dagiti barangay officials kadagiti nasken nga ubraenda.
Kabayatanna, mapalpalagipan dagiti residente ken dagiti turista nga agturong iti nasao a munsipyo a saan nga agpakampante gapu ta anyaman nga oras ket mabalin nga adda ti mapasamak a panagreggaay iti daga kas resulta iti agdama a paniempo.
Maiyunay-unay met ti panagaramat dagiti motorista iti headlightsda gapu ta mapaspasaran iti angep kadagiti kalsada partikular iti halsema.//Bombo Rob Dominguez
