BAGUIO CITY – Masuspindiren dagiti nagduduma a panagsanay dagiti kameng ti Philippine National Police (PNP) a maisaysayangkat ditoy siudad ti Baguio.
Kasaruno daytoy ti panangaprobar ni PNP Chief Gen. Guillermo Eleazar iti kiddaw ni City Mayor Benjamin Magalong a panangsuspindirna kadagiti nasao a panagsanay kalpasan ti panagpositibo iti COVID-19 ti kanayonan a police trainees.
Maibasar iti mensahe nga impatulod ni Mayor Magalong kenni Gen. Eleazar, naduktalan ti panagpositibo iti COVID-19 kadagiti trainees isut gapuna a kasapulan ti panakaisardeng dagiti nasao a panagsanay.
Dinakamatna ti pagkasapulan iti panakaiyunay-unay ti panagtungpal iti health protocols nangruna ta agparparang a saan nga agtungtungpal dagiti trainees iti minimum public health standards.
Maibasar iti datus ti City Epidemiology Surveillance Unit, nagpositibo iti COVID-19 ti kanayonan a 26 a police trainees manipud Hunyo 28 agingga Hulyo 11.
Maipalagip nga idi napalabas a bulan, nailista ti 104 a kaso ti COVID-19 kadagiti regular police officers a maipaspasidong ti leadership training iti Cordillera Administrative Region Training Center idi napalabas a bulan.
Dagus a nakontrol ti nasao nga outbreak babaen iti panakaisayangkat ti testing, contact tracing, isolation ken quarantine measures.
