Kinondenar ti Presidential Communications Office ti panagwaras ti peke a dokumento seknan iti medical examination ni President Ferdinand Marcos Jr.
Sigun iti nasao nga opisina,peke ti nasao a medical document ken saan daytoy a resulta wenno nagtaud iti lehitimo a medical examination ti presidente.
Impetteng ti PCO a ti nilaon ti peke a dokumento ket saan a maibasar iti agdama a kasasaad ti salun-at ti presidente.
Inladawanda daytoy nga irresponsable, panangallilaw ken nalawag a panaglabsing iti karbengan ni President Marcos Jr. iti privacy.
Malaksid iti dayta, maysa pay daytoy a nagtaudan ti awan an-anayna a panakaalarma ti publiko ken panakadadael ti talek kadagiti institusyon.
Gapu iti dayta, inyunay-unay ti nasao nga opisina iti publiko nga agtalek laeng kadagiti lehitimo nga statements manipod kadagiti otorisado a government sources tapno maliklikan ti panagwaras ti palso nga impormasyon.
Mainaig iti dayta, nangipablaak metten ti public advisory ti St. Luke’s Medical Center seknan iti peke a dokumento.
Maipalagip nga idi napan a lawas ket nadiagnose ni President Marcos Jr. iti diverticulitis— maysa a kondisyon mainaig iti colon nu sadino, naipaagas daytoy iti St. Luke’s Medical Center.
Idi laeng kalman, kinumpirmar ti PCO a naisubli ti presidente iti pagagasan ngem nakaruar metlaeng daytoy a dagus ken agtultuloy ti panagrekoberna manipod iti nasao a sakit.
Immuna metten nga impatalged ti presidente a saan a life-threatening ti kondisyon daytoy ken awan ti rumbeng a pagdanagan seknan iti salun-atna.//Rob
