BAGUIO CITY – Tarigagay ti lokal a gobyerno ti Baguio a mabakunaan ti agarup 60 a porsiento iti puntiryada a bilang ti populasyon ti siudad a mabakunaan kontra iti COVID-19 iti panaggibus ti agdama a tawen.
Sigun kenni Mayor Benjamin Magalong, posible a madanun ti nasao a porsiento kas maibasar kadagiti pattapatta ngem agdepende daytoy iti suplay dagiti bakuna ken dadduma nga agbalin a lapped.
Nupay kasta, mangnamnama latta daytoy a makompleto ti siudad ti kasapulan a bakuna inton Agosto babaen iti bukod a procurement program ti lokal a gobyerno, dagiti kari dagiti pribado a grupo ken ti alokasyon manipud iti nasyonal a gobyerno.
Dinakamat met ni City Health Officer Dr. Rowena Galpo a ‘doable’ wenno mabalin a maragpat ti nasao a puntiryada kas maibasar iti kalkulasion dagitoy babaen iti panagaramatda iti agdama a set-up ti vaccination program ti siudad.
Naamuan a dumanon iti 355,000 doses ti bakuna kontra iti COVID-19 ti kasapulan ti siudad tapnu makompleto ti panakabakuna dagiti 190,000 nga indibidual iti siudad.
Innayon pay ni Dr. Galpo a tapnu maragpat ti puntirya ket nasken a maragpat ti 3,000 a bilang ti mabakunaan iti innaldaw iti uneg ti 124 nga aldaw ken tunggal maysa kadagiti innem a vaccination teams iti uppat a vaccination sites ti siudad ket nasken a makabakuna iti 120 nga indibidual iti uneg ti uppat nga aldaw iti linawas.
Inkarina pay nga aramidenda ti amin tapnu maragpat ti nasao a puntirya ti siudad.
